Кіна не будзе

Слуцкія міліцыянты ўчынілі аблаву на пенсіянераў пад час прагляду фільму пра Слуцкае паўстанне.



sluck_logo.jpg

23 лістапада 2013 года 17 жыхароў горада Слуцка сабраліся для прагляду фільма «40 дзён сялянскай рэспублікі» у маленькай зале Казловіцкага дома культуры. Фільм не забаронены. Пастаноўка зроблена на дзяржаўным канале АНТ і яго можна з лёгкасцю знайсці на Youtube. Праз дзесяць хвілін пасля пачатку мерапрыемства ў залу ўварваліся супрацоўнікі аддзела аховы правапарадку і прафілактыкі праванарушэнняў Слуцкага РАУС. Узначальваў іх сам начальнік аддзела Шклярэўскі Дзмітрый Міхайлавіч.

sluck_1_logo.jpg

Расказвае Зінаіда Цімошак. Пенсіянерка, грамадская актывістка. Былая настаўніца гісторыі:
 

—​ У нашым горадзе у канцы лістапада кожны год адбываюцца мітынгі у гонар гадавіны Слуцкага паўстання. Многія мае знаёмыя ўжо пажылыя людзі, якія вучыліся яшчэ на савецкіх падручніках. Мне ўжо надакучыла ім тлумачыць, чаму наш горад такі прывабны для штогадовых вандровак людзей з іншых гарадоў. Тут як раз патэлефаванала Ніна Стужынская, кандыдат гістарычных навук, аўтар кнігі пра Слуцкае паўстанне, якая кансультавала пастаноўшчыкаў фільма.

sluck_3_logo.jpg

Запытала, ці ёсць цікавасць у людзей да фільма, знятага АНТ пра слуцкія падзеі. Цікавасць у людзей была. Дамовіліся наконт памяшкання у Казловіцкім доме культуры, паколькі там ёсць экран і лепшыя магчымасці для прагляду. Ніякіх папярэдніх заявак не падавалі ў райвыканкам, паколькі не ведалі, ці збяруцца людзі, ці знойдзем транспарт. (Казловічы знаходзяцца прыкладна ў 8 кіламетрах ад Слуцка). Да таго ж мы не збіраліся мітынгаваць, ці абмяркоўваць праблемы і не лічылі, што міліцыя аб’явіць гэта незаконнай сходкай. Аўдыторыя сабралася, у асноўным, пажылая. Многім даўно пераваліла за 70 гадоў, яны рады былі сабрацца і паглядзець фільм пра гістарычныя падзеі горада.

sluck_2_logo.jpg


 

—​ А Шклярэўскі і міліцыянты ўстроілі такі вэрхал, што людзі да гэтага часу не могуць апомніцца. Не паспела Стужынская Ніна сказаць колькі ўступных слоў да фільма, як ў дзверы пагрукалі і на парозе стаяў начальнік аддзела Шклярэўскі. Людзі прасілі яго прысесці, паглядзець, чым яны займаюцца, паслухаць цікавага чалавека, але ён быў няўмольны.
 

Спачатку на допыт вызвалі мяне, пасля міліцыянты раздзяліліся на «тройкі» і вялі «апытванні» людзей адразу ў 4-5 памяшканнях. Цягнулася гэтая дрэнная справа больш за дзве гадзіны. Пасля удзельнікаў прагляду фільма адпусцілі, а мяне завезлі ў Слуцкі РАУС, паколькі я адказалася падпісваць адміністратыўны пратакол, напісаны маленькімі літарамі неразборлівым почыркам Шклярэўскага. Адначасова запатрабавала весці са мной размову на белмове і скласці на гэтай жа мове пратакол. Міліцыянт Шклярэўскі паспрабаваў размаўляць на мове, а пасля стаў шукаць перакладчыка. Спачатку хацеў назначыць мне перакладчыкам дырэктара Казловіцкага дома культуры Туміловіча Аляксандра, але я адмовілася ад яго паслуг. Туміловіч Аляксандр цудоўна валодае беларускай мовай, пастаношчык выдатных спектакляў. Але пад час гэтай «аблавы» выглядзеў знясіленым. Было зразумела, што яго чакаюць наперадзе вялікія непрыемнасці.
 

У адносінах да мяне ў РАУС складзены адміністратыўны пратакол аб парушэнні артыкула 23.34. Кодэкса аб адміністратыўным правапарушэнні: парушэнне парадку арганізацыі правядзення сходаў. Папярэджана аб тым, што справа будзе перададзена ў суд.