"Вясна": затрыманых па справе "беларускамоўных графіці" можна кваліфікаваць як новых палітычных зняволеных

Праваабарончы цэнтр “Вясна” заклікае спыніць крымінальны пераслед па ч. 2 арт. 339 Крымінальнага кодэксу Рэспублікі Беларусь (“Злоснае хуліганства”) у дачыненні да Вячаслава Касінерава, Яраслава Ульяненкава, а таксама да затрыманых Максіма Пекарскага, Вадзіма Жаромскага, і неадкладна вызваліць іх з-пад варты.



viasnalogo.jpg

Як стала вядома Праваабарончаму цэнтру “Вясна”, 11 жніўня 2015 года супрацоўнікамі МУС былі затрыманыя пяцёра моладзевых актывістаў: Максім Пекарскі, Вадзім Жаромскі, Вячаслаў Касінераў, Яраслаў Ульяненкаў і грамадзянін Расійскай Федэрацыі Павал (прозвішча невядомае). Двое апошніх былі пазней вызваленыя пад падпіску аб нявыездзе, а ў дачыненні да М. Пекарскага, В. Жаромскага была абраная мера стрымання ў выглядзе ўтрымання пад вартай да прад’яўлення абвінавачвання. В. Касінераў знаходзіцца пад вартай у шпіталі, у які ён быў змешчаны з падвойным пераломам сківіцы пасля затрымання супрацоўнікамі МУС.

Падставай для крымінальнага пераследу і змяшчэння пад варту да прад’яўлення абвінавачванняў дадзеных маладых людзей стала ўзбуджэнне Упраўленнем Следчага камітэта Рэспублікі Беларусь па г. Мінску крымінальнай справы па ч. 2 арт. 339 КК Рэспублікі Беларусь (“Злоснае хуліганства”) па факце нанясення графіці палітычнага зместу на плоце каля будынка па зав. Альшэўскага і на будынку былой вайсковай часткі па вул. Лынькова, і арт. 341 КК Рэспублікі Беларусь (“Апаганьванне збудаванняў і псаванне маёмасці”) — па факце псавання маёмасці індывідуальнага прадпрымальніка (біг-борда з выявай супрацоўнікаў міліцыі) па вул. Гарэцкага ў г. Мінску.

У сувязі з гэтым Праваабарончы цэнтр “Вясна” адзначае наступнае:

1.                        Напісанне графіці з надпісам “Беларусь мае быць беларускай” з выявай беларускага арнаменту, перакрэсленых свастыкі і сярпа з молатам, а таксама з надпісам “Рэвалюцыя свядомасці, яна ўжо ідзе…” з выявай чалавека з бутэлькай у руце, не маюць на мэце парушэння грамадскага парадку і не выказваюць яўнай непавагі да грамадства, не ўтрымліваюць прапаганду нацыянальнай, рэлігійнай, расавай, сацыяльнай ці іншай варожасці. Характар і змест учыненых надпісаў сведчыць аб адсутнасці хуліганскіх матываў у дзеяннях асобаў, якія іх учынілі і, адпаведна, аб адсутнасці складу злачынства, прадугледжанага ч. 2. арт. 339 КК Рэспублікі Беларусь.

2.                        Раследванне крымінальнай справы, узбуджанай па прыкметах арт. 341 КК Рэспублікі Беларусь павінна адбывацца ў межах, вызначаных Крымінальным і Крымінальна-працэсуальным кодэксамі Рэспублікі Беларусь з улікам таго, што дадзенае злачынства адносіцца да катэгорыі злачынстваў, якія не ўяўляюць вялікай грамадскай небяспекі і не прадугледжвае магчымасці ўтрымання пад вартай абвінавачаных у яго здзяйсненні. Акрамя таго, пытанне аб кампенсацыі нанеснай шкоды можа быць разгледжаны ў грамадзянска-прававым парадку.

3.                        Дзеянні супрацоўнікаў МУС, якія ажыццяўлялі затрыманне ўказаных асобаў з выкарыстаннем фізічнай сілы і спецсродкаў, насілі відавочна непрапарцыйны і жорсткі характар і пацягнулі фізічныя пашкоджанні затрыманым.

Праваабарончы цэнтр “Вясна” заяўляе, што:

·               утрыманне М. Пекарскага і В. Жаромскага пад вартай па падазрэнні ў здзяйсненні імі злоснага хуліганства з’яўляецца незаконнай і непрапарцыйнай мерай;

 

·               утрыманне пад вартай М. Пекарскага і В. Жаромскага ажыццяўляецца пры адсутнасці складу злачынства, прадугледжанага ч.2 арт. 339 КК у іх дзеяннях;

 

·               наяўнасць палітычных матываў у дзеяннях органаў дзяржаўнай улады, скіраваных на ўмацаванне ўлады суб’ектамі ўладных паўнамоцтваў, дазваляюць кваліфікаваць М.Пекарскага і В. Жаромскага як палітычных зняволеных.

 

Праваабарончы цэнтр “Вясна” патрабуе:

·                           неадкладна перагледзіць прынятыя ў дачыненні да М. Пекарскага і В. Жаромскага працэсуальныя меры, скіраваныя на іх ізаляцыю і вызваліць іх з-пад варты;

·                           спыніць крымінальны пераслед М.Пекарскага, В. Жаромскага, В.Касінерава, Я. Ульяненкава па ч. 2 арт. 339 КК Рэспублікі Беларусь у сувязі з адсутнасцю складу дадзенага злачынства ў іх дзеяннях;

·                           гарантаваць выкананне ўсіх працэсуальных правоў на перыяд вядзення расследавання, у тым ліку права на абарону і свабоду ад жорсткага і бесчалавечнага абыходжання;

·                           правесці належнае расследаванне фактаў жорсткага і бесчалавечнага абыходжання ў дачыненні да затрыманых і прыцягнуць вінаватых да ўстаноўленай законам адказнасці.

spring96.org__files_images_be_420b4ed023dda6358bd1b8bc5abea2a1.jpeg

Максім Пекарскі

 

bel_grafiti2.jpg

Яраслаў Ульяненкаў, Вячаслаў Касінераў,  Вадзім Жаромскі


spring96.org