Daily Star: Андрэй Аляксандраў спявае ў камеры «You'll Never Walk Alone»
Напярэдадні гадавіны з дня прэзідэнцкіх выбараў у Беларусі брытанскі таблоід Daily Star апублікаваў артыкул пра палітвязня журналіста і медыяменеджара Андрэя Аляксандрава. У ім ён паказваецца няўхільным правадніком свабоды слова, лёгкім у камунікацыі чалавекам, гарачым фанатам футбольнага клуба «Ліверпуль» і аматарам брытанскіх пабаў.
Спасылаючыся на сяброў Андрэя, аўтары пішуць, што для захавання пазітыўнага настрою ён кожны дзень спявае ў камеры песню «You'll Never Walk Alone» («Ты ніколі не будзеш самотны»), якая з’яўляецца гімнам яго любімага «Ліверпуля», — прыводзіць вытрымкі з матэрыялу брытанскага выдання REFORM.by.
На працягу кар’еры Андрэй працаваў у лонданскім «Index on Censorship», праводзячы кампанію «За свабоду слова». Былы галоўны рэдактар «Index on Censorship» Рэйчэл Джолі ахарактарызавала яго як чалавека, які ўкладае «жыццё і душу» ў павышэнне дасведчанасці аб тым, што адбываецца ў Беларусі.
«Ён сапраўды сур’ёзна ставіцца да свабоды СМІ і лічыць, што свет не надае дастаткова ўвагі таму, што там адбываецца. (...) Ён старанна працаваў, каб паказаць гісторыі з Беларусі, калі большасць журналістаў былі б занадта занепакоеныя, каб іх асвятляць. Ён працягвае распавядаць гісторыі, калі іншыя здаюцца», — цытуе выданне яе словы.
У матэрыяле гаворыцца, што Андрэй вядомы сваёй любоўю да футбола і брытанскіх пабаў, быў заўсёднікам лонданскага Betsey Trotwood і любіць добры соладавы віскі.
Па словах аўтараў, цёпла адклікаецца аб ім і калега Наташа Шміт.
«З ім было вельмі лёгка бавіць час, і ў яго выдатнае пачуццё гумару. (...) Ён быў добрым чалавекам з акружэння, ён быў настолькі паслаблены, што мог бы зняць любую напружанасць у офіснай палітыцы», — кажа яна.
Андрэй Аляксандраў і яго сяброўка Ірына Злобіна былі затрыманыя 12 студзеня. Іх абвінавачвалі ў фінансаванні пратэстаў. У чэрвені Аляксандраву было прад’яўленае абвінавачванне ў здрадзе дзяржаве. Следства лічыць, што Андрэй дапамагаў фондам BY_help і BYSOL у правядзенні дзейнасці, накіраванай на прычыненне шкоды нацыянальнай бяспецы Беларусі. Аляксандраў і Злобіна прызнаныя палітвязнямі. Яны ўтрымліваюцца ў мінскім СІЗА №1 на вуліцы Валадарскага.