Філосафа Уладзіміра Мацкевіча, які зараз за кратамі, прызналі схільным да экстрэмізму

Філосафа і метадолага Уладзіміра Мацкевіча ў мінскім СІЗА на вуліцы Валадарскага прызналі схільным да экстрэмізму. Ён сядзіць у камеры адзін. Пра гэта гаворыцца на старонцы ў фэйсбуку, прысвечанай палітвязню.

Паводле старонкі, ад 14 жніўня Мацкевічу перадалі толькі 5 лістоў.

Уладзімер Мацкевіч — філосаф і метадолаг, грамадзкі дзеяч, тэлевядоўца. Заснавальнік і кіраўнік Агенцтва гуманітарных тэхналогій, першы кіраўнік Рады Міжнароднага кансорцыюму «ЕўраБеларусь» (міжнародная грамадзкая арганізацыя, створаная прадстаўнікамі НДА ў 2007 годзе і зарэгістраваная ў Літве ў 2009 годзе), заснавальнік праграмы стварэння «Лятучага ўніверсітэту».

4 жніўня супрацоўнікі КДБ прыйшлі з ператрусамі да шэрагу прадстаўнікоў няўрадавых арганізацый і ініцыятываў. Бальшыню адпусцілі ў той жа дзень ці пазней, а Уладзіміра Мацкевіча абвінавацілі ў «арганізацыі групавых дзеянняў, якія груба парушаюць грамадзкі парадак» (ч. 1 арт. 342 Крымінальнага кодэксу, да чатырох гадоў пазбаўлення волі) і пакінулі пад вартай. Праваабаронцы прызналі яго палітычным вязнем.
Паводле «Свабоды».