Казакевіч: Спроба Лукашэнкі паўплываць на суседзяў крызісам з мігрантамі правалілася

Наадварот, пазіцыя краін ЕС стала яшчэ больш кансалідаванай і жорсткай, заявіў «Беларускаму партызану» дырэктар інстытута «Палітычная сфера» Андрэй Казакевіч.
Фота Дзмітрыя Дзмітрыева

Фота Дзмітрыя Дзмітрыева


— Праз міграцыйны крызіс у Еўрасаюзе пачалі рыхтаваць пяты пакет санкцый супраць Беларусі. Што ў ім можа быць?

— Па-першае, могуць быць прынятыя санкцыі супраць чыноўнікаў, якія былі ўцягнутыя ў палітычныя рэпрэсіі супраць грамадзянскай супольнасці і СМІ: супраць суддзяў, пракурораў, супрацоўнікаў Міністэрства юстыцыі і выканкамаў. Мабыць, гэтыя санкцыі будуць мець сімвалічны характар ​​і краінам Еўрасаюза будзе дастаткова проста ўзгадніць іх зацвярджэнне.

Па-другое, абмяркоўваецца пашырэнне чорнага спісу з кампаній. Называюцца «Белавія» (супраць яе могуць быць прынятыя ўжо канкрэтныя санкцыі), кампаніі, якiя садзейнiчалi перавозцы мігрантаў з Ірака і іншых краін. Нельга выключаць увядзення санкцый супраць іншых дзяржпрадпрыемстваў.

Але на гэты конт кансенсусу на еўрапейскім узроўні, падобна, няма. Таму няпроста прагназаваць, ці будуць прынятыя гэтыя санкцыі.

Абмяркоўваюцца і далейшыя санкцыі супраць бізнесменаў, звязаных з Лукашэнкам. Але прыняць іх будзе таксама няпроста: бізнесмены актыўна лабіруюць свае інтарэсы, іх прадстаўнікі працуюць у Бруселі.

У якасці магчымага бліжэйшага тэрміну прыняцця пятага пакета санкцый называюць ужо верасень.

— Польшча ўвяла рэжым надзвычайнага становішча на мяжы з Беларуссю. Прымусяць новыя санкцыі (або, можа быць, нават іх пагроза) беларускія ўлады адмовіцца ад канфлікту з суседзямі?

— Падобна на тое, пік напружанасці на межах з нелегальнымі мігрантамі ўжо пройдзены. Ён прыпаў на сярэдзіну лета-пачатак жніўня. Як здаецца, міграцыйны крызіс быў адным з апошніх механізмаў, якімі беларускія ўлады хацелі паўплываць і націснуць на краіны Еўрасаюза.

Былі намеры ўводзіць санкцыі супраць еўрапейскіх кампаній, але гэта не мела ніякага выніку. Павелічэнне расійскай ваеннай прысутнасці ў Беларусі таксама не мела эфекту.

Улады палохалі Еўропу перспектывай павелічэння наркатрафіку і іншымі пытаннямі, звязанымі са злачыннасцю. Але ў такім выпадку Мінск рызыкуе нарвацца на вельмі жорсткі адказ.

Мне здаецца, беларускія ўлады цяпер будуць больш асцярожна ставіцца да перспектывы канфліктаў з суседзямі і больш не будуць старацца яшчэ больш абвастраць сітуацыю. Да гэтага іх прымушаюць санкцыі.

Хай рэжым працягвае паводзіць сябе ірацыянальна, але да яго павінна прыходзіць разуменне, што плюсоў ад гэтага ён не атрымлівае, а для дзяржавы такія дзеянні становяцца ўсё даражэйшымі і даражэйшымі.

— Іншымі словамі, спроба рэжыму паўплываць на суседзяў крызісам з мігрантамі правалілася?

— Думаю, яна адназначна не ўдалася. На еўрапейскім узроўні нават не пачалася дыскусія пра магчымую адмену санкцый, пра тое, каб неяк перагледзець прынятыя абмежаванні. А мэта рэжыму была менавіта ў гэтым.

Былі нават фантазіі, што ў выніку міграцыйнага крызісу ў Літве падзе ўрад і да ўлады прыйдуць сілы, з якімі Мінск зможа весці дыялог. Але адбылося наадварот: Еўропа яшчэ больш закрылася, дамаўляцца з Лукашэнкам там не хочуць, пазіцыя краін ЕС стала яшчэ больш кансалідаванай і цвёрдай. Аб чым сведчыць і падрыхтоўка пятага пакета санкцый.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: