Дасье ў карыкатурах: 9/11 праз дваццаць гадоў

Дваццаць гадоў таму свет змяніўся. 11 верасня 2001 года чатыры захопленыя ісламістамі самалёты ўрэзаліся ў два будынкі, якія сімвалізавалі эканамічную, палітычную і ваенную моц ЗША. Наступствы тых падзей адчуваюцца па гэты дзень.


Юбілей амаль супаў з вывадам войскаў амерыканцаў і іх саюзнікаў з Афганістана. Яны, уласна, там і з'явіліся, каб пакараць арганізатараў нападу 9/11. Так ЗША пачалі самую працяглую вайну ў сваёй гісторыі. Аднак у выніку талібы зноў вярнуліся ў Кабул. Адразу ж з'явіўся папулярны мем: амерыканцы вызвалілі Афганістан ад талібаў, каб праз 20 гадоў талібы вярнуліся да ўлады. Бясконцая вайна ў Афганістане — тэма карыкатуры Peoples Daily.


Але не толькі Афганістан абмяркоўваецца ў рамках гэтай даты. Яшчэ ўспамінаюць многія загадкі, звязаныя з тэрактам 20-гадовай даўніны. Афіцыйная версія падзей 11 верасня неаднойчы крытыкавалася. Напрыклад, ставілася пад сумнеў тое, што характар абвальвання вежаў адпавядае таму, які маглі выклікаць траплення самалётаў і пажары. Скептыкі сцвярджалі, што разбурэнне больш падобна на кантраляваны знос, а афіцыйная версія ігнаруе шматлікія паведамленні сведак аб выбухах унутры вежаў. Выказвалася меркаванне, што ўрадавыя чыноўнікі ЗША ведалі аб маючых адбыцца нападах, а самі напады былі спланаваныя амерыканскімі спецслужбамі.

Дарэчы, уладальнік вежаў-блізнят застрахаваў іх за некалькі тыдняў да 11 верасня 2001 года, прычым страхоўка ад тэрарыстычных нападаў была прапісаная асобным эпізодам. У ракурсе такой канспіралогіі не дзіўна, што мастак выдання Santa Cruz параўнаў 9/11 са старажытным артэфактам, загадку якога спрабуюць разгадаць археолагі.

Актыўна ўспамінаюць і пра ролю ў тых падзеях каралеўскай сям'і Саўдаўскай Аравіі, якая была звязана з Аль-Каідай. Гэтую тэму адміністрацыя тагачаснага прэзідэнта Джорджа Буша не хацела падымаць у рамках расследавання, паколькі мела з саўдзітамі фінансавыя і эканамічныя сувязі. Цяперашні прэзідэнт Джо Байдэн паабяцаў раскрыць закрытыя архівы спецслужбаў. На карыкатуры выдання West Central Джордж Буш у жаху ад слоў Байдэна, паколькі можа ўсплыць непрыемная для яго тэма саўдзітаў.

Таксама ў гэтыя дні ўспамінаюць пажарнікаў і медыкаў, якія загінулі, спрабуючы выратаваць супрацоўнікаў Сусветнага Гандлёвага Цэнтра. Нагадаем, што пры тушэнні пажару тады загінулі 341 пажарны і 8 дактароў хуткай дапамогі.

Аднак самае інтрыгоўнае пытанне — як дзве апошнія дэкады паўплываюць на курс ЗША? Прэзідэнт Джо Байдэн ужо заявіў, што пасля канфузу ў Афганістане Амерыка адмовіцца ад вайсковых інтэрвенцый для ўстанаўлення дэмакратыі. Аднак тое ж казалі і пасля В’етнама. У любым выпадку нейкія ўрокі сусветны гегемон зробіць. На малюнку рэсурсу Cartoon Movemen Дзядзька Сэм спрабуе зразумець — дзе ж ён памыліўся падчас апошніх дваццаці гадоў?
І, нарэшце, самы арыгінальны погляд на апошнія 20 гадоў прапанаваў мастак з выдання Orange country. Ён нагадаў, як моцна змяніўся за гэты час свет. 9.11.2001 мы яшчэ не ведалі, што лічбавыя тэхналогіі за такі кароткі тэрмін цалкам зменяць наша жыццё. І, магчыма, вайна з тэрарызмам на фоне гэтага ў глабальным вымярэнні проста дробязь.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: