Кіеў перадаў замежным спецыялістам вынікі экспертызаў у справе смерці Віталя Шышова

Самі вынікі пакуль не публікуюць, удакладняе «Радыё Свабода».
Акцыя памяці Віталя Шышова ў Адэсе

Акцыя памяці Віталя Шышова ў Адэсе

Кіеўская гарадская пракуратура атрымала вынікі асноўных судова-медычных экспертызаў у справе пра смерць кіраўніка «Беларускага дому ва Украіне» Віталя Шышова і перадала іх на вывучэнне замежным экспертам.

«Атрыманне вынікаў асноўных экспертызаў дазволіла выдаць цела для пахавання», — паведамілі ў прэсавай службе Кіеўскай гарадской пракуратуры, якая ажыццяўляе працэсуальнае кіраўніцтва расследаваннем гэтай справы.

Як вынікае з адказу пракуратуры, следчыя не перакваліфікавалі артыкулы, паводле якіх расследуюць гэтую справу. Дагэтуль афіцыйныя версіі — самагубства або забойства з імітацыяй самагубства.

«Атрыманыя вынікі экспертызаў перакладзеныя і накіраваныя на вывучэнне замежным экспертам. На гэты час дасудовае расследаванне ў крымінальнай вытворчасці працягваецца паводле той жа кваліфікацыі», — дадалі ў пракуратуры.

6 верасня міністр унутраных справаў Украіны Дзяніс Манастырскі заявіў, што следства ў справе аб смерці Віталя Шышова ўжо вызначылася з версіяй трагедыі.

Пра гэта Дзяніс Манастырскі заявіў у інтэрв'ю агенцтву «Інтерфакс-Україна», адказваючы на пытанне, ці зразумела ўжо, што гэта было — самагубства ці забойства.

Раней следчыя паведамілі, што ў справе аб смерці Віталя Шышова пацярпелым бокам прызналі яго блізкага сваяка, якому дазволяць азнаёміцца з матэрыяламі расследавання, а да правядзення экспертызаў далучылі замежных спецыялістаў з Літвы.

Віталя Шышова пахавалі 26 верасьня на Паўночных могілках Кіева.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: